قید مکمل کرنے والے کسی قیدی کو اپنے پاس نہیں رکھتے، پاکستان

اسلام آباد (صالح ظافر) بھارتی خفیہ ایجنسی 146146را145145 میں خدمات انجام دینے والے بھارتی بحریہ کے پاکستان میں زیر حراست افسر کلبھوشن یادیو تک قونصلر رسائی دینے کی بھارتی درخواست پاکستان نے مسترد کر دی ہے۔ دفتر خارجہ کے اعلیٰ ذرائع نے ایک سوال کے جواب میں دی نیوز کو بتایا ہے کہ کلبھوشن یادیو قونصلر رسائی کے اہل نہیں کیونکہ وہ سویلین قیدی کے زمرے میں نہیں آتے اور پاکستان فراخدلانہ انداز سے بھارت کو اس کے سویلین قیدیوں تک قونصلر رسائی دیتا رہا ہے۔ ذرائع نے کہا کہ بھارت پر واضح کر دیا گیا ہے کہ پاکستان کسی بھی ایسے قیدی کو اپنے پاس نہیں رکھتا جو اپنی جیل کی سزا مکمل کر چکا ہو۔ ذرائع کا کہنا ہے کہ بدقسمتی کی بات ہے کہ بھارتی جیلوں میں قید پاکستانیوں کو نامنا سب حالات میں رکھا جاتا ہے لیکن پاکستان نے مسلم ریاست ہونے کی حیثیت سے ہمیشہ سے قانون کی خلاف ورزی کرنے والے بھارتی قیدیوں کو قانون کے مطابق انسانی حالات میں رکھا ہے۔ ذرائع کا کہنا ہے کہ دونوں ملکوں کے درمیان اس تجویز پر بات چیت ہو رہی ہے کہ ایک دوسرے کے ملک میں موجود قیدیوں تک جوڈیشل اور میڈیکل ٹیموں کو رسائی دی جائے۔ باہمی مذاکرات کے بعد سفارتی چینلز کے ذریعے ہی قیدیوں کا تبادلہ ممکن ہوگا۔